ಇದು ಆತನ ಸೃಷ್ಟಿ; ಇದು ಈತನ ಸೃಷ್ಟಿ

ಕೊಯ್ಂಕ-ಪೊಯ್ಂಕ-ಬುರುಂ-ಗಿರುಂ  ಬಸ್ಸು
ಈತನ ಸೃಷ್ಟಿ.
ದಡಬಡ-ಗಿಜಿಗಿಜಿ-ಲಜಿಗಿಜಿ  ಮನಸ್ಸು
ಇದು ಆತನ ಸೃಷ್ಟಿ.

ಕಣ್ಣಿಗೆ ಕಾಣುವವ ಈತ
ಕಣ್ಣಿಗೆ ಕಾಣದೆ ಎಲ್ಲವ ನೀಡುತ್ತಿರುವವ ಆತ
ಕಣಕಣಗಳ ಮೇಲೂ ಈರ್ವರ ಸೃಷ್ಟಿಯ ವೃಷ್ಟಿ ಅಚ್ಚೆ ಇವೆ.

"ಮುಟ್ಟುವೆ ಇನ್ನೇನು ಮುಟ್ಟುವೆ
ನಿನ್ನ ರಹಸ್ಯವ ಬಯಲು ಮಾಡುವೆ" ಎಂದು ನಿಂತಲ್ಲಿ ನಿಲ್ಲದೆ ಕೂತಲ್ಲಿ ಕೊಳೆಯದೆ ಛಲ ಬಿಡದ ಭೂತ ಈತ
"ನೀ ನನ್ನ ಮುಟ್ಟಲು ಮುರುಟಿ ಹಾಕುವೆ, ಸೊಕ್ಕಿ ನಲಿಯುತಿರುವೆ, ನೀ ಅಂದುಕೊಂಡ ಸಕ್ಕರೆಯ ಅಕ್ಕರೆಯದಿ ನೀಡಲಾರೆ" ಎಂದು ಆಗಾಗ ಎಚ್ಚರಿಸುತ್ತಾ ಸಲೀಲದಿ ಬುಸುಗುಟ್ಟುತ್ತಿರುವ ಆತ

ಈ ಈರ‍್ವರ ಸೃಷ್ಟಿಯಾಟದ ಪೈಪೋಟಿಯ ಫಲ
ಪೈಪು ತೊಟ್ಟಿಗೆ ಸೇರಿದ ಜಲ, ಗಾಳಿ, ಬೆಳಕು, ಕೊಳಕು, ಮತ್ತೊಂದೂ, ಮಗದೊಂದೂ, ವೀರ‍್ಯದ ಫಲ ಎಲ್ಲಾ ಲಾಲ

ನಾ ಸಿಗಲಾರೆ, ಕೊಡಲಾರೆ
ನಾ ಹುಡುಕಿಯೇ ತೀರುವೆ, ಪಡೆದಿಯೇ ತೀರುವೆ
ಎಂದು ಆತ ಈತ ಸೃಷ್ಟಿಯಾಟದ ಬಯಲಿಗಿಳಿದಿರುವವರು

ಜನನ-ಮರಣ ಈತನಿಗುಂಟು
ಆದರೆ,
ರಕ್ತರಕ್ಕಸನಂತೆ ಹುಟ್ಟುತ್ತಿರುವ ಈತನ ಸಂತತಿಯವರಲ್ಲಿ ಆತನನ್ನು ಹುಡುಕುವ ಛಲವನ್ನು ಬತ್ತದಂತೆ ಕಾಯ್ದುಕೊಳ್ಳುವ ಜಾಣ್ಮೆ ಈತನಿಗುಂಟು.
ಉಂಟು, ಉಂಟು ಈತನ ಕಬಳಿಕೆಯ ನೀತಿಗೆ ಕಡಿವಾಣ ಹಾಕುವ ಜಾಣ್ಮೆ  ಆತನಿಗೂ ಉಂಟು.

ಕಾಯಬೇಕು ಈತನೇ ಕಾಯಬೇಕು
ಈಗಿಲ್ಲದಿದ್ದರೂ ನಮ್ಮ ಸಂತತಿಯವರು ತಾಳ್ಮೆಯ ತಂತಿ ಹಿಡಿದು ಕಾಯಬೇಕು
ಸೃಷ್ಟಿಯ ನಾವೆಯಲ್ಲಿ ಸಮಪಾಲು ಪಡೆಯದೆ ಬಹುಪಾಲನ್ನು ಪಡೆದು ವ್ಯರ್ಥದಿ  ಇರುವಾಗ
ಮುಂದೆ ಇರುವುದೆಲ್ಲ ಬತ್ತಿಹೋದಾಗ
ಜಗಳದಿ ಗಳಗಳ ಸುರಿಸುವ ಹಾಗೆ,  ನಾಲ್ಕೂ ಗಳ ದೊರೆಯದಂತೆ ಮಾಡುವತನ, ಆತ ಈತನನ್ನು ಸೋಲಿಸುವತನ ಕಾಯಬೇಕು.

ಈ ಮೇಲಣ ಸಾಲುಗಳು
ಆತನಿಂದ ಈತನಿಂದ ಸೃಷ್ಟಿಯಾದ ಗೋಜಗೋಜಲಾದ, ಈತನಿಗೂ ಅರ್ಥವಾಗದ ನಿಲುವುಗಳ ಸಾಲುಗಳು
ಇದನ್ನು ಅರ್ಥ ಮಾಡಿಕೊಳ್ಳಲು ಈತನ ಮನಹೃದಯಕ್ಕೆ ಹೊಕ್ಕಬೇಕಿದೆ ಆತನ ದಯೆಯ ಹುಳುಗಳು
ಅದಕ್ಕೂ ಮುನ್ನ ತೊಲಗಬೇಕು
ಈತನಲ್ಲಿನ ಗೊಡ್ಡುಗಳು, ಸಮಾಜಕ್ಕೆ ಮಾರಕವಾದ ಕೊಳಕುಗಳು